Qamrayku paqarimusqan

QAMRAYKUPA YURIMUSQAN

Unay watam qawasqay Kawsayta karu karupi qawarqani. Sapa kutillam imayna payman asuykuyta munaspay rikchaq llamkaykunata rikurichiq kani. Kaywanchu kanman, kaywanchu icha, nispay. Iskay kimsa kutitaqa rimasqanta uyariyllapas uyariqmi kani. Chaymantaqa chunyaq pachamanmi yaykuq kani huk llamkay rikurimunankama. Yaqa kimsa watam qunqaymanta qunqaymanta rimasqallanta uyariq karqani. Ukunqa sunqunqa karu karupitaqmi karqan. Manam qawaqchu kani manataqmi paypas qawawaqchu.

Unay watam Qamrayku paqarinanpaq suyarqani, huktaraq huktaraqmi paqariysiwananpaq umachaq karqani. Yanqa. Huk punchawqa sunquyllaypi rimapakuni. Kaynaqa manam maymanpas riyta atisaqchu. Hina kikin llaqtataña illasaq icha kaynaqa qawayllapas qawaykuyman, nispay. Chaynam karqun. LLamkay rikuriqamun, kay llaqtamanmi riyta munani nispay hikutakuni; anri nispam uyaykuwan.

• Amawtallay, imaynallam kachkanki, imallatapas rurasunchikyá, nispa niykuwan amawta masiy, paypa sutinmi Elmer.

Chayllatachusmi suyachkarqani. Llamkayta munaptiykiqa llamkasuntaqyá nispa niykuni. Rimanakuyta qallaykuniku. Rimayqa miskikaykamunña. Paypapas ñuqapapas yawarqa timpuyta qallakuykun, sunquqa pumpumyakuchkanñam. Kayna kusisqa, kallpachakusqam Ilmirchawan qiparquni.

Chay punchaw tutaqa Irwintapas qayaykuniñam. Kaynatam rimanakurquni, ima ninkitaq qam llamkayman yaykuwaqchu niptiymi paypas kusisqa anri wawqillay yaykusunmi riki nispa kutiykachimuwan. Kimsañam kaniku. Manañam sapallayñachu kimsaña, kunanqa puririchiyta atisaqñam nispa yachasqay llaqtaman kutikuni.

5525/2018 watapim kachkanchik, 307/27 punchaw, ayriway killapim tarikuni. Kay punchawmi kallpayanaykama punchawchasqamanta rimanakuniku.

Tutaykuytaqa manayá uyariyllañachu uyarini, kunanqa chimpaypi tiyaqtañam qawani. Aswan kaywanqa kusi kusisqa puñukuykuni. Kay punchawmantam punchawchasqapi musquyta qallaykuni.

311/29 punchaw, ayriway killapiqa kikin Kawsaywan kuska punchawchasqamanta rimanakuniku, kusisqam paypas qipan. Paywanqa kaynam punchawchasqa kanqa nispaña rimanakuniku. Kaykunama sapa uyapi kanqa, mayqintapas atisqaykichikmanhina akllaspa qillqamunkichik nispa rimanakuniku. Sutinqa QAMRAYKUM kanqa nispayña rimapayani. Allinmi nispam niwan.

Hawan hunkatapas Wanka Willkaman kutinim, Ilmirwan tupanim, rimanakunim. Ña paytapas imayna punchawchasqa kasqanta riqsichiniña. 329/17 punchaw, aymuray killapi yapamanta wiñasqay chiri llaqtaman kutini. Kunanqa 12 punchaw qipamuqmi rini. Kay hunkam samanay wasimanta punchawchasqapa lliw qillqaqkunata hikutayta qallaykuni. Ñuqaqa sapa tuta QAMRAYKU qillqaypi hikutakuni. Huk, iskay, kimsa uyaña sumaqllaña rikurikamuchkan.

Unaykamuptinkuqa qayapayastin qaypayastinmi sapa punchaw kani. 334/22 punchaw, aymuray killapiqa, yaqa 3:00 a.p.ta qatarispay QAMRAYKUta tukupani. Achikyarqamunña, Ilmirchata qayani, mana kutichikamunchu, churinmi huknin uyapaq chiruspa apachimunan karqan, manam chaskiwanchu, manataqmi churin imatapas apachimunchu. Alwinuta qayani, iskay kimsa kutipiña chaskirqamuwan, aswan payqa samanay wasiman hamurqun. Imataña ruraspapas kunami Wankayuman QAMRAYKU mirachinankupaq apachinayki nispa kunaykuni. Chaynaykuspayña hawka Churkampaman illani.

Tuta Ilmirta kunasqay rurasqanku qatipanaypaq qayaykuni. Manam apachisqachu nispa niykawan. Ilmircha, qampa makiyipiñam Qamrayku kachkan nispa nini. Imananchu, ñuqañapas illasaqnañachiki nispa kutiykachimuwan. Chaynapiñam PDFllapi aparqachisqaku. Mana pipapas qatipasqan, ñuqapas wayrallaña rurasqaypi pasaypaq mana allin qillqasqakunata paqarirqachimusqaniku.

Chirupaq umalliqmi Llunku, paypa qipanpiqa achka runachiki kakuchkan chaynaqa Qamrayku aypuyqa manam sasachu kanqa nispaymi umacharqani, allinlla qatipaykuptiyqa sapallanmi kasqa manam pipas yanapasqachu, chaynañam riqsisqay masiykunata qayani hinaspayku Risirinti sutiyuq samana wasipi huñunakuniku. Elmer, Benito, Cesáreo, Vilma, Humberto hinaspa ñuqa. Kawsayqa, hamunchu. 337/25 punchaw aymuray killam.

Ñam amawta QAMRAYKUTA aparqachimuwanña, Aya Kuchumanpas aparqachinñam nispa kusisqa Elmer qayarqamuwan, supayta ñuqapas kusirikuni. Chaynaqa kaqllanpim chayarqamunqa. Simikunapa punchawninpim QAMRAYKU rikurimunanta munarqani, kay punchawpaqmi lluqisirqamun. 338/26 punchawpi, aymuray killapiqa ñam amawta Elmer QAMRAYKUta rantikuchkarqaña. QAMRAYKUm kay punchawchasqa lluqsirqamun, QAMRAYKUm llapa imata rurarqani, QAMRAYKUm yapamanta kay llaqtapi tarikuni, nispay kikillay kusirikuni.

339/27 punchaw, aymuray killapiqa, Aya Kuchumanta hamuq warmi qarikunawan Wanka Willka warmi qarikunawan huñunakuykuspayku musuq huñuta paqarirqachiniku. Kay huñunakuymanpas Kawsay hamunkichu aswan kallpachawanki. QAMRAYKUm kaykunapi purini, QAMRAYKUm kaykunata rurani, imanasqataq ayqikunki nispay sunquyta llakichini. Kaynam QAMRAYKU sutiyuq punchawchasqa paqarimurqan yurimurqan. Kunanqa isqun yupapiñam kachkanchik.